Read the Bible

¹ The title of the two and eiytetithe salm. The song of the salm of Asaph. God, who schal be lijk thee? God, be thou not stille, nether be thou peesid.² For lo! thin enemyes sowneden; and thei that haten thee reisiden the heed.³ Thei maden a wickid counsel on thi puple; and thei thouyten ayens thi seyntis.⁴ Thei seiden, Come ye, and leese we hem fro the folk; and the name of Israel be no more hadde in mynde.⁵ For thei thouyten with oon acord;⁶ the tabernaclis of Ydumeys, and men of Ismael disposiden a testament togidere ayens thee. Moab, and Agarenus, Jebal, and Amon, and Amalech;⁷ alienys with hem that dwellen in Tyre.⁸ For Assur cometh with hem; thei ben maad in to help to the sones of Loth.

⁹ Make thou to hem as to Madian, and Sisara; as to Jabyn in the stronde of Sison.¹⁰ Thei perischiden in Endor; thei weren maad as a toord of erthe.¹¹ Putte thou the prynces of hem as Oreb and Zeb; and Zebee and Salmana. Alle the princis of hem, that seiden;¹² Holde we bi eritage the seyntuarie of God.¹³ My God, putte thou hem as a whele; and as stobil bifor the face of the wynde.¹⁴ As fier that brenneth a wode; and as flawme brynnynge hillis.¹⁵ So thou schalt pursue hem in thi tempeste; and thou schalt disturble hem in thin ire.¹⁶ Lord, fille thou the faces of hem with schenschipe; and thei schulen seke thi name.¹⁷ Be thei aschamed, and be thei disturblid in to world of world; and be thei schent and perische thei.¹⁸ And knowe thei, that the Lord is name to thee; thou aloone art the hiyeste in ech lond.