Read the Bible

¹ The title of the eiytetithe salm. To the ouercomer in the pressours of Asaph. Make ye fulli ioye to God, oure helpere; synge ye hertli to God of Jacob.² Take ye a salm, and yyue ye a tympan; a myrie sautere with an harpe.³ Blowe ye with a trumpe in Neomenye; in the noble dai of youre solempnite.⁴ For whi comaundement is in Israel; and doom is to God of Jacob.⁵ He settide that witnessing in Joseph; whanne he yede out of the lond of Egipt, he herde a langage, which he knew not.⁶ He turnede a wei his bak fro birthens; hise hondis serueden in a coffyn.⁷ In tribulacioun thou inwardli clepidist me, and Y delyuerede thee; Y herde thee in the hid place of tempest, Y preuede thee at the water of ayenseiyng.

⁸ My puple, here thou, and Y schal be witnesse ayens thee;⁹ Israel, if thou herist me, a fresche God schal not be in thee, and thou schalt not worschipe an alien god.¹⁰ For Y am thi Lord God, that ladde thee out of the lond of Egipt; make large thi mouth, and Y schal fille it.¹¹ And my puple herde not my vois; and Israel yaue not tente to me.¹² And Y lefte hem aftir the desiris of her herte; thei schulen go in her fyndyngis.¹³ If my puple hadde herde me; if Israel hadde go in my weies.¹⁴ For nouyt in hap Y hadde maad low her enemyes; and Y hadde send myn hond on men doynge tribulacioun to hem.¹⁵ The enemyes of the Lord lieden to hym; and her tyme schal be in to worldis.¹⁶ And he fedde hem of the fatnesse of whete; and he fillide hem with hony of the stoon.