Read the Bible

¹ The `title of the sixte and seuentithe salm. `To the ouercomere on Yditum, `the salm of Asaph. With my vois Y criede to the Lord; with my vois to God, and he yaf tent to me.<sup>2</sup> In the dai of my tribulacioun Y souyte God with myn hondis; in the nyyt `to fore hym, and Y am not disseyued. Mi soule forsook to be coumfortid;³ Y was myndeful of God, and Y delitide, and Y was exercisid; and my spirit failide.⁴ Myn iyen bifore took wakyngis; Y was disturblid, and Y spak not.⁵ I thouyte elde daies; and Y hadde in mynde euerlastinge yeeris.⁶ And Y thouyte in the nyyt with myn herte; and Y was exercisid, and Y clensid my spirit.⁷ Whether God schal caste awei with outen ende; ether schal he not lei to, that he be more plesid yit?⁸ Ethir schal he kitte awei his merci into the ende; fro generacioun in to generacioun?⁹ Ethir schal God foryete to do mercy; ethir schal he withholde his mercies in his ire?¹⁰ And Y seide, Now Y bigan; this is the chaunging of the riythond of `the hiye God.

¹¹ I hadde mynde on the werkis of the Lord; for Y schal haue mynde fro the bigynnyng of thi merueilis.¹² And Y schal thenke in alle thi werkis; and Y schal be occupied in thi fyndyngis.¹³ God, thi weie was in the hooli; what God is greet as oure God?¹⁴ thou art God, that doist merueilis. Thou madist thi vertu knowun among puplis;¹⁵ thou ayenbouytist in thi arm thi puple, the sones of Jacob and of Joseph.¹⁶ God, watris sien thee, watris sien thee, and dredden; and depthis of watris weren disturblid.¹⁷ The multitude of the soun of watris; cloudis yauen vois.¹⁸ For whi thin arewis passen; the vois of thi thundir was in a wheel. Thi liytnyngis schyneden to the world; the erthe was moued, and tremblid.¹⁹ Thi weie in the see, and thi pathis in many watris; and thi steppis schulen not be knowun.²⁰ Thou leddist forth thi puple as scheep; in the hond of Moyses and of Aaron.