Read the Bible

¹ The title of the foure and seuentithe salm. `To the ouercomere; leese thou not the salm of the song of Asaph. God, we schulen knouleche to thee, `we schulen knouleche; and we schulen inwardli clepe thi name.² We schulen telle thi merueilis; whanne Y schal take tyme, Y schal deme riytfulnesses.³ The erthe is meltid, and alle that duellen ther ynne; Y confermede the pileris therof.⁴ I seide to wickid men, Nyle ye do wickidli; and to trespassouris, Nyle ye enhaunce the horn.⁵ Nyle ye reise an hiy youre horn; nyle ye speke wickidnesse ayens God.

⁶ For nether fro the eest, nethir fro the west, nethir fro desert hillis; for God is the iuge.⁷ He mekith this man, and enhaunsith hym; for a cuppe of cleene wyn ful of meddling is in the hoond of the Lord.⁸ And he bowide of this in to that; netheles the drast therof is not anyntischid; alle synneris of erthe schulen drinke therof.⁹ Forsothe Y schal telle in to the world; Y schal synge to God of Jacob.¹⁰ And Y schal breke alle the hornes of synneris; and the hornes of the iust man schulen be enhaunsid.