Read the Bible

¹ The title of the thre and fiftithe salm. To victorie in orguns, ether in salmes, the lernyng of Dauid, `whanne Zyfeys camen, and seiden to Saul, Whethir Dauid is not hid at vs? God, in thi name make thou me saaf; and in thi vertu deme thou me.² God, here thou my preier; with eeris perseyue thou the wordis of my mouth.³ For aliens han rise ayens me, and stronge men souyten my lijf; and thei settiden not God bifor her siyt.

⁴ For, lo! God helpith me; and the Lord is vptaker of my soule.⁵ Turne thou awei yuelis to myn enemyes; and leese thou hem in thi treuthe.⁶ Wilfuli Y schal make sacrifice to thee; and, Lord, Y schal knouleche to thi name, for it is good.⁷ For thou delyueridist me fro al tribulacioun; and myn iye dispiside on myn enemyes.