Read the Bible

¹ The title of the seuene and thrittithe salm. `The salm of Dauid, to bythenke on the sabat. Lord, repreue thou not me in thi strong veniaunce; nether chastice thou me in thin ire.<sup>2</sup> For thin arowis ben fitchid in me; and thou hast confermed thin hond on me.<sup>3</sup> Noon helthe is in my fleisch fro the face of thin ire; no pees is to my boonys fro the face of my synnes.<sup>4</sup> For my wickidnessis ben goon ouer myn heed; as an heuy birthun, tho ben maad heuy on me.<sup>5</sup> Myn heelid woundis weren rotun, and ben brokun; fro the face of myn vnwisdom.<sup>6</sup> I am maad a wretche, and Y am bowid doun til in to the ende; al dai Y entride sorewful.<sup>7</sup> For my leendis ben fillid with scornyngis; and helthe is not in my fleisch.<sup>8</sup> I am turmentid, and maad low ful greetli; Y roride for the weilyng of myn herte.<sup>9</sup> Lord, al my desire is bifor thee; and my weilyng is not hid fro thee.<sup>10</sup> Myn herte is disturblid in me, my vertu forsook me; and the liyt of myn iyen `forsook me, and it is not with me.¹¹ My frendis and my neiyboris neiyiden; and stoden ayens me. And thei that weren bisidis me stoden afer;

¹² and thei diden violence, that souyten my lijf. And thei that souyten yuels to me, spaken vanytees; and thouyten gilis al dai.¹³ But Y as a deef man herde not; and as a doumb man not openynge his mouth.¹⁴ And Y am maad as a man not herynge; and not hauynge repreuyngis in his mouth.¹⁵ For, Lord, Y hopide in thee; my Lord God, thou schalt here me.¹⁶ For Y seide, Lest ony tyme myn enemyes haue ioye on me; and the while my feet ben mouyd, thei spaken grete thingis on me.¹⁷ For Y am redi to betyngis; and my sorewe is euere in my siyt.¹⁸ For Y schal telle my wickidnesse; and Y schal thenke for my synne.¹⁹ But myn enemyes lyuen, and ben confermed on me; and thei ben multiplyed, that haten me wickidli.²⁰ Thei that yelden yuels for goodis, backbitiden me; for Y suede goodnesse.²¹ My Lord God, forsake thou not me; go thou not awei fro me.²² Lord God of myn helthe; biholde thou in to myn help.