Read the Bible

¹ `The title of the fyue and thrittithe salm. `To victorie, to Dauid, `the seruaunt of the Lord. The vniust man seide, that he trespasse in hym silf; the drede of God is not bifor hise iyen.² For he dide gilefuli in the siyt of God; that his wickidnesse be foundun to hatrede.³ The wordis of his mouth ben wickidnesse and gile, he nolde vndirstonde to do wel.⁴ He thouyte wickidnesse in his bed, he stood nyy al weie not good; forsothe he hatide not malice.

⁵ Lord, thi merci is in heuene; and thi treuthe is `til to cloudis.⁶ Thi riytfulnesse is as the hillis of God; thi domes ben myche depthe of watris. Lord, thou schalt saue men and beestis;⁷ as thou, God, hast multiplied thi merci. But the sones of men; schulen hope in the hilyng of thi wyngis.⁸ Thei schulen be fillid gretli of the plentee of thin hows; and thou schalt yyue drynke to hem with the steef streem of thi likyng.⁹ For the wel of life is at thee; and in thi liyt we schulen se liyt.¹⁰ Lord, sette forth thi mercy to hem, that knowen thee; and thi ryytfulnesse to hem that ben of riytful herte.¹¹ The foot of pryde come not to me; and the hond of the synnere moue me not.¹² There thei felden doun, that worchen wickidnesse; thei ben cast out, and myyten not stonde.