Read the Bible

¹ The title of the nyne and twentithe salm. The salm of song, for the halewyng of the hows of Dauid. Lord, Y schal enhaunse thee, for thou hast vp take me; and thou delitidist not myn enemyes on me.² Mi Lord God, Y criede to thee; and thou madist me hool.³ Lord, thou leddist out my soule fro helle; thou sauedist me fro hem that goen doun into the lake.⁴ Ye seyntis of the Lord, synge to the Lord; and knowleche ye to the mynde of his hoolynesse.⁵ For ire is in his indignacioun; and lijf is in his wille. Wepyng schal dwelle at euentid; and gladnesse at the morewtid.

⁶ Forsothe Y seide in my plentee; Y schal not be moued with outen ende.⁷ Lord, in thi wille; thou hast youe vertu to my fairnesse. Thou turnedist awei thi face fro me; and Y am maad disturblid.⁸ Lord, Y schal crye to thee; and Y schal preye to my God.⁹ What profit is in my blood; while Y go doun in to corrupcioun? Whether dust schal knouleche to thee; ethir schal telle thi treuthe?¹⁰ The Lord herde, and hadde merci on me; the Lord is maad myn helpere.¹¹ Thou hast turned my weilyng in to ioye to me; thou hast to-rent my sak, and hast cumpassid me with gladnesse.¹² That my glorie synge to thee, and Y be not compunct; my Lord God, Y schal knouleche to thee with outen ende.