Read the Bible

¹ The title of the hundrid and thre and fourtithe salm. `A salm. Blessid be my Lord God, that techith myn hondis to werre; and my fyngris to batel.² Mi merci, and my refuyt; my takere vp, and my delyuerer. Mi defender, and Y hopide in him; and thou makist suget my puple vnder me.³ Lord, what is a man, for thou hast maad knowun to him; ether the sone of man, for thou arettist him of sum valu?⁴ A man is maad lijk vanyte; hise daies passen as schadow.⁵ Lord, bowe doun thin heuenes, and come thou doun; touche thou hillis, and thei schulen make smoke.⁶ Leite thou schynyng, and thou schalt scatere hem; sende thou out thin arowis, and thou schalt disturble hem.⁷ Sende out thin hond fro an hiy, rauysche thou me out, and delyuere thou me fro many watris; and fro the hond of alien sones.⁸ The mouth of which spak vanite; and the riythond of hem is the riyt hond of wickidnesse.

⁹ God, Y schal synge to thee a new song; I schal seie salm to thee in a sautre of ten stringis.¹⁰ Which yyuest heelthe to kingis; which ayen bouytist Dauid, thi seruaunt, fro the wickid swerd rauische thou out me.¹¹ And delyuere thou me fro `the hond of alien sones; the mouth of whiche spak vanyte, and the riythond of hem is the riyt hond of wickidnesse.<sup>12</sup> Whose sones ben; as new plauntingis in her yongthe. The douytris of hem ben arayed; ourned about as the licnesse of the temple.<sup>13</sup> The selers of hem ben fulle; bringinge out fro this vessel in to that. The scheep of hem ben with lambre, plenteuouse in her goingis out;<sup>14</sup> her kien ben fatte. `No falling of wal is, nether passing ouere; nether cry is in the stretis of hem.¹⁵ Thei seiden, `The puple is blessid, that hath these thingis; blessid is the puple, whos Lord is the God of it.