Read the Bible

¹ The `title of the hundrid and nyne and thrittithe `salm. To victorie, the salm of Dauith. Lord, delyuere thou me fro an yuel man; delyuere thou me fro a wickid man.² Whiche thouyten wickidnesses in the herte; al dai thei ordeyneden batels.³ Thei scharpiden her tungis as serpentis; the venym of snakis vndir the lippis of hem.⁴ Lord, kepe thou me fro the hond of the synnere; and delyuere thou me fro wickid men. Which thouyten to disseyue my goyngis;⁵ proude men hidden a snare to me. And thei leiden forth cordis in to a snare; thei settiden sclaundir to me bisidis the weie.⁶ I seide to the Lord, Thou art mi God; Lord, here thou the vois of my biseching.⁷ Lord, Lord, the vertu of myn heelthe; thou madist schadowe on myn heed in the dai of batel.

⁸ Lord, bitake thou not me fro my desire to the synnere; thei thouyten ayens me, forsake thou not me, lest perauenture thei ben enhaunsid.⁹ The heed of the cumpas of hem; the trauel of her lippis schal hile hem.¹⁰ Colis schulen falle on hem, thou schalt caste hem doun in to fier; in wretchidnessis thei schulen not stonde.¹¹ A man a greet ianglere schal not be dressid in erthe; yuels schulen take an vniust man in perisching.¹² I haue knowe, that the Lord schal make dom of a nedi man; and the veniaunce of pore men.¹³ Netheles iust men schulen knouleche to thi name; and riytful men schulen dwelle with thi cheer.