Read the Bible

¹ The `title of the hundrid and seuenthe salm. The song of `the salm of Dauid. Min herte is redi, God, myn herte is redi; Y schal singe, and Y schal seie salm in my glorie.² My glorie, ryse thou vp, sautrie and harp, rise thou vp; Y schal rise vp eerli.³ Lord, Y schal knouleche to thee among puplis; and Y schal seie salm to thee among naciouns.⁴ For whi, God, thi merci is greet on heuenes; and thi treuthe is til to the cloudis.⁵ God, be thou enhaunsid aboue heuenes; and thi glorie ouer al erthe.

⁶ That thi derlingis be delyuerid, make thou saaf with thi riythond, and here me; God spak in his hooli.⁷ I schal make ful out ioye, and Y schal departe Siccimam; and Y schal mete the grete valei of tabernaclis.⁸ Galaad is myn, and Manasses is myn; and Effraym is the vptaking of myn heed. Juda is my king; Moab is the caudron of myn hope.⁹ In to Ydume Y schal stretche forth my scho; aliens ben maad frendis to me.¹⁰ Who schal lede me forth in to a stronge citee; who schal lede me forth til in to Idume?¹¹ Whether not thou, God, that hast put vs awei; and, God, schalt thou not go out in oure vertues?¹² Yyue thou help to vs of tribulacioun; for the heelthe of man is veyn.¹³ We schulen make vertu in God; and he schal bringe oure enemyes to nouyt.