Read the Bible

¹ The title of the `hundrid and o salm. The preier of a pore man, whanne he was angwishid, and schedde out his speche bifore the Lord. Lord, here thou my preier; and my crie come to thee.² Turne not awei thi face fro me; in what euere dai Y am troblid, bowe doun thin eere to me. In what euere day Y schal inwardli clepe thee; here thou me swiftli.³ For my daies han failid as smoke; and my boonus han dried vp as critouns.⁴ I am smytun as hei, and myn herte dried vp; for Y haue foryete to eete my breed.⁵ Of the vois of my weilyng; my boon cleuede to my fleische.⁶ I am maad lijk a pellican of wildirnesse; Y am maad as a niyt crowe in an hous.⁷ I wakide; and Y am maad as a solitarie sparowe in the roof.⁸ Al dai myn enemyes dispisiden me; and thei that preisiden me sworen ayens me.⁹ For Y eet aschis as breed; and Y meddlide my drinke with weping.¹⁰ Fro the face of the ire of thin indignacioun; for thou reisinge me hast hurtlid me doun.¹¹ Mi daies boweden awei as a schadewe; and Y wexede drie as hei.

¹² But, Lord, thou dwellist with outen ende; and thi memorial in generacioun and in to generacioun.¹³ Lord, thou risinge vp schalt haue merci on Sion; for the tyme `to haue merci therof cometh, for the tyme cometh.¹⁴ For the stones therof plesiden thi seruauntis; and thei schulen haue merci on the lond therof.¹⁵ And, Lord, hethen men schulen drede thi name; and alle kingis of erthe schulen drede thi glori.¹⁶ For the Lord hath bildid Sion; and he schal be seen in his glorie.¹⁷ He bihelde on the preier of meke men; and he dispiside not the preier of hem.¹⁸ Be these thingis writun in an othere generacioun; and the puple that schal be maad schal preise the Lord.¹⁹ For he bihelde fro his hiye hooli place; the Lord lokide fro heuene in to erthe.²⁰ For to here the weilingis of feterid men; and for to vnbynde the sones of slayn men.²¹ That thei telle in Sion the name of the Lord; and his preising in Jerusalem.²² In gaderinge togidere puplis in to oon; and kingis, that thei serue the Lord.

²³ It answeride to hym in the weie of his vertu; Telle thou to me the fewnesse of my daies.²⁴ Ayenclepe thou not me in the myddil of my daies; thi yeris ben in generacioun and in to generacioun.²⁵ Lord, thou foundidist the erthe in the bigynnyng; and heuenes ben the werkis of thin hondis.²⁶ Tho schulen perische, but thou dwellist perfitli; and alle schulen wexe eelde as a clooth. And thou schalt chaunge hem as an hiling, and tho schulen be chaungid;²⁷ but thou art the same thi silf, and thi yeeris schulen not faile.²⁸ The sones of thi seruauntis schulen dwelle; and the seed of hem schal be dressid in to the world.