Read the Bible

¹ Hennus forward, my britheren, haue ye ioye in the Lord. To write to you the same thingis, to me it is not slow, and to you it is necessarie.² Se ye houndis, se ye yuele werk men, se ye dyuysioun.³ For we ben circumcisioun, which bi spirit seruen to God, and glorien in Crist Jhesu, and han not trist in the fleisch,

⁴ thouy Y haue trust, yhe, in the fleisch. If ony othere man is seyn to triste in the fleisch,⁵ Y more, that was circumcidid in the eiytthe dai, of the kyn of Israel, of the lynage of Beniamyn, an Ebrew of Ebrewis, bi the lawe a Farisee,⁶ bi loue pursuynge the chirche of God, bi riytwisnesse that is in the lawe lyuynge with out playnt.⁷ But whiche thingis weren to me wynnyngis, Y haue demed these apeyryngis for Crist.⁸ Netheles Y gesse alle thingis to be peirement for the cleer science of Jhesu Crist my Lord. For whom Y made alle thingis peyrement, and Y deme as drit,

⁹ that Y wynne Crist, and that Y be foundun in hym, not hauynge my riytwisnesse that is of the lawe, but that that is of the feith of Crist Jhesu, that is of God the riytwisnesse in feith,¹⁰ to knowe hym, and the vertu of his risyng ayen, and the felouschipe of his passioun, and be maad lijk to his deeth,¹¹ if on ony maner Y come to the resurreccioun that is fro deth.¹² Not that now Y haue takun, or now am parfit; but Y sue, if in ony maner Y comprehende, in which thing also Y am comprehendid of Crist Jhesu.¹³ Bretheren, Y deme me not that Y haue comprehendid; but o thing, Y foryete tho thingis that ben bihyndis, and stretche forth my silf to tho thingis that ben bifore,¹⁴ and pursue to the ordeyned mede of the hiy clepyng of God in Crist Jhesu.

¹⁵ Therfor who euere we ben perfit, feele we this thing. And if ye vndurstonden in othere manere ony thing, this thing God schal schewe to you.¹⁶ Netheles to what thing we han comun, that we vndurstonden the same thing, and that we perfitli dwelle in the same reule.

¹⁷ Britheren, be ye my foleweris, and weyte ye hem that walken so, as ye han oure fourme.¹⁸ For many walken, whiche Y haue seid ofte to you, but now Y wepinge seie, the enemyes of Cristis cros,¹⁹ who ende is deth, whos god is the wombe, and the glorie in confusioun of hem, that saueren ertheli thingis.²⁰ But oure lyuyng is in heuenes; fro whennus also we abiden the sauyour oure Lord Jhesu Crist,²¹ which schal reforme the bodi of oure mekenesse, that is maad lijk to the bodi of his clerenesse, bi the worching bi which he mai `also make alle thingis suget to hym.