Read the Bible

¹ And Jonas preiede to the Lord his God fro the fischis wombe,² and seide, Y criede to God of my tribulacioun, and he herde me; fro the wombe of helle Y criede, and thou herdist my vois.³ Thou castidist me doun in to depnesse, in the herte of the see, and the flood cumpasside me; alle thi swolowis and thi wawis passiden on me.⁴ And Y seide, Y am cast awei fro siyt of thin iyen; netheles eftsoone Y schal see thin hooli temple.⁵ Watris cumpassiden me `til to my soule, depnesse enuyrownede me, the see hilide myn heed.⁶ Y wente doun to the vtmeste places of hillis, the barris of erthe closiden me togidere, in to withouten ende; and thou, my Lord God, schalt reise vp my lijf fro corrupcioun.⁷ Whanne my soule was angwisched in me, Y bithouyte on the Lord, that my preier come to thee, to thin hooli temple.⁸ Thei that kepen vanytees, forsaken his merci idili.⁹ But Y in vois of heriyng schal offre to thee; what euer thingis Y vowide, Y schal yelde to the Lord, for myn helthe.

¹⁰ And the Lord seide to the fisch, and it castide out Jonas `in to the drie lond.