Read the Bible

¹ And the Lord addide, and spak to Joob,² Whether he, that stryueth with God, schal haue rest so liytli? Sotheli he, that repreueth God, owith for to answere to hym.³ Forsothe Joob answeride to the Lord,⁴ and seide, What may Y answere, which haue spoke liytli? Y schal putte myn hond on my mouth.⁵ Y spak o thing, which thing Y wold, that Y hadde not seid; and Y spak anothir thing, to which Y schal no more adde.

⁶ Forsothe the Lord answeride to Joob fro the whirlewynd,⁷ and seide, Girde thou as a man thi leendis, and Y schal axe thee, and schewe thou to me.⁸ Whether thou schalt make voide my doom, and schalt condempne me, that thou be maad iust?⁹ And if thou hast an arm, as God hath, and if thou thundrist with lijk vois, `take thou fairnesse aboute thee,<sup>10</sup> and be thou reisid an hiy, and be thou gloriouse, and be thou clothid `in faire clothis.¹¹ Distrie thou proude men in thi woodnesse, and biholde thou, and make lowe ech bostere.¹² Biholde thou alle proude men, and schende thou hem; and al to-breke thou wickid men in her place.¹³ Hide thou hem in dust togidere, and drenche doun her faces in to a diche.¹⁴ And Y schal knowleche, that thi riyt hond may saue thee.

¹⁵ Lo! behemot, whom Y made with thee, schal as an oxe ete hey.¹⁶ His strengthe is in hise leendis, and his vertu is in the nawle of his wombe.¹⁷ He streyneth his tail as a cedre; the senewis of his `stones of gendrure ben foldid togidere.<sup>18</sup> Hise boonys ben as the pipis of bras; the gristil of hym is as platis of yrun.<sup>19</sup> He is the bigynnyng of the weies of God; he, that made hym, schal sette his swerd to hym.<sup>20</sup> Hillis beren eerbis to this behemot; alle the beestis of the feeld pleien there.<sup>21</sup> He slepith vndur schadewe, in the pryuete of rehed, in moiste places.<sup>22</sup> Schadewis hilen his schadewe; the salewis of the ryuer cumpassen hym.<sup>23</sup> He schal soupe vp the flood, and he schal not wondre; he hath trist, that Jordan schal flowe in to his mouth.<sup>24</sup> He schal take hem bi `the iyen of hym, as bi an hook; and bi scharpe schaftis he schal perse hise nosethirlis.