Read the Bible

¹ Mi spirit schal be maad feble; my daies schulen be maad schort, and oneli the sepulcre is left to me.² Y have not synned, and myn iye dwellith in bittirnessis.³ Lord, delyuere thou me, and sette thou me bisidis thee; and the hond of ech fiyte ayens me.⁴ Thou hast maad the herte of hem fer fro doctryn, `ethir knowyng of treuthe; therfor thei schulen not be enhaunsid.<sup>5</sup> He bihetith prey to felowis, and the iyen of hise sones schulen faile.<sup>6</sup> He hath set as in to a prouerbe of the comyn puple, and his saumple bifor hem.<sup>7</sup> Myn `iye dasewide at indignacioun; and my membris ben dryuun as in to nouyt.⁸ Iust men schulen wondre on this thing; and an innocent schal be reisid ayens an ypocrite.⁹ And a iust man schal holde his weie, and he schal adde strengthe to clene hondis.

¹⁰ Therfor alle `ye be conuertid, and come ye; and Y schal not fynde in you ony wiys man.<sup>11</sup> My daies ben passid; my thouytis ben scaterid, turmentynge myn herte.<sup>12</sup> Tho han turned the nyyt `in to day; and eft aftir derknessis hope liyt.¹³ If Y `susteyne, ether suffre pacientli, helle is myn hous; and Y haue arayede my bed in derknessis.¹⁴ Y seide to rot, Thou art my fadur; and to wormes, Ye ben my modir and my sister.¹⁵ Therfor where is now myn abidyng? and who biholdith my pacience?¹⁶ Alle my thingis schulen go doun in to deppeste helle; gessist thou, whether reste schal be to me, nameli there.