Read the Bible

¹ Also he seide to Moises, `Stie thou to the Lord, thou, and Aaron, and Nadab, and Abyu, and seuenti eldere men of Israel; and ye schulen worschipe afer,<sup>2</sup> and Moises aloone stie to the Lord, and thei schulen not neiye, nether the puple schal stie with hym.<sup>3</sup> Therfore Moises cam, and telde to the puple alle the wordis and domes of the Lord; and al the puple answeride with o vois, We schulen do alle the wordis of the Lord, whiche he spak.<sup>4</sup> Forsothe Moises wroot alle the wordis of the Lord; and he roos eerli, and bildide an auter to the Lord at the rootis of the hil, and he bildide twelue titlis bi twelue lynagis of Israel.<sup>5</sup> And he sente yonge men of the sones of Israel, and thei offriden brent sacrifices, and `thei offriden pesible sacrifices `to the Lord, twelue calues.<sup>6</sup> And so Moises took half the part of the blood, and sente in to grete cuppis; forsothe he schedde the residue part on the auter.<sup>7</sup> And he took the book of the boond of pees, and redde, while the puple herde; whiche seiden, We schulen do alle thingis which the Lord spak, and we schulen be obedient.<sup>8</sup> Forsothe he took, and sprengide `the blood on the puple, and seide, This is the blood of the boond of pees, which the Lord couenauntide with yow on alle these wordis.

⁹ And Moises, and Aaron, and Nadab, and Abyu, and seuenti of the eldere men of Israel stieden,¹⁰ and seiyen God of Israel, vndur hise feet, as the werk of safire stoon, and as heuene whanne it is cleer.¹¹ And he sente not his hond on hem of the sones of Israel, that hadden go fer awei; and thei sien God, and eeten and drunkun.

¹² Forsothe the Lord seide to Moises, `Stie thou to me in to the hil, and be thou there, and Y schal yyue to thee tablis of stoon, and the lawe, and comaundementis, whiche Y haue write, that thou teche the children of Israel.¹³ Moises and Josue his mynystre risen, and Moises stiede in to the hil of God,¹⁴ and seide to the eldere men, Abide ye here, til we turnen ayen to you; ye han Aaron and Hur with you, if ony thing of questioun is maad, ye schulen telle to hem.¹⁵ And whanne Moises hadde stied,¹⁶ a cloude hilide the hil, and the glorie of the Lord dwellide on Synai, and kyueride it with a cloude sixe daies; forsothe in the seuenthe dai the Lord clepide hym fro the myddis of the cloude; forsothe the licnesse of glorie of the Lord¹⁷ was as fier brennynge on the cop of the hil in the siyt of the sones of Israel.¹⁸ And Moises entride into the myddis of the cloude, and stiede in to the hil, and he was there fourti daies and fourti nyytis.