Read the Bible

¹ ܡܶܟ݁ܺܝܠ ܐܰܚܰܝ ܩܰܕ݁ܺܝܫܶܐ ܕ݁ܶܐܬ݂ܩܪܺܝܬ݁ܽܘܢ ܒ݁ܩܶܪܝܳܢܳܐ ܕ݁ܡܶܢ ܫܡܰܝܳܐ ܚܙܰܐܘܽܗ݈ܝ ܠܗܳܢܳܐ ܫܠܺܝܚܳܐ ܘܪܰܒ݂ ܟ݁ܽܘܡܪܶܐ ܕ݁ܬ݂ܰܘܕ݁ܺܝܬ݂ܰܢ ܝܶܫܽܘܥ ܡܫܺܝܚܳܐ ܀² ܕ݁ܰܡܗܰܝܡܰܢ ܠܡܰܢ ܕ݁ܥܰܒ݂ܕ݁ܶܗ ܐܰܝܟ݂ ܡܽܘܫܶܐ ܒ݁ܟ݂ܽܠܶܗ ܒ݁ܰܝܬ݁ܶܗ ܀³ ܣܰܓ݁ܺܝܳܐܐ ܗ݈ܝ ܓ݁ܶܝܪ ܬ݁ܶܫܒ݁ܽܘܚܬ݁ܶܗ ܕ݁ܗܳܢܳܐ ܛܳܒ݂ ܡܶܢ ܕ݁ܡܽܘܫܶܐ ܐܰܝܟ݁ܰܢܳܐ ܕ݁ܣܰܓ݁ܺܝ ܐܺܝܩܳܪܳܐ ܕ݁ܒ݂ܰܢܳܝܶܗ ܕ݁ܒ݂ܰܝܬ݁ܳܐ ܛܳܒ݂ ܡܶܢ ܒ݁ܶܢܝܳܢܶܗ ܀⁴ ܟ݁ܽܠ ܒ݁ܰܝܬ݁ܳܐ ܓ݁ܶܝܪ ܡܶܢ ܐ݈ܢܳܫ ܗ݈ܽܘ ܡܶܬ݂ܒ݁ܢܶܐ ܗܰܘ ܕ݁ܶܝܢ ܕ݁ܒ݂ܳܢܶܐ ܟ݁ܽܠ ܐܰܠܳܗܳܐ ܗ݈ܘ ܀⁵ ܘܡܽܘܫܶܐ ܐܰܝܟ݂ ܥܰܒ݂ܕ݁ܳܐ ܐܶܬ݂ܗܰܝܡܰܢ ܒ݁ܒ݂ܰܝܬ݁ܳܐ ܟ݁ܽܠܶܗ ܠܣܳܗܕ݁ܽܘܬ݂ܳܐ ܕ݁ܰܐܝܠܶܝܢ ܕ݁ܰܥܬ݂ܺܝܕ݂ܳܢ ܗ݈ܘܰܝ ܠܡܶܬ݂ܡܰܠܳܠܽܘ ܒ݁ܺܐܝܕ݂ܶܗ ܀⁶ ܡܫܺܝܚܳܐ ܕ݁ܶܝܢ ܐܰܝܟ݂ ܒ݁ܪܳܐ ܥܰܠ ܒ݁ܰܝܬ݁ܶܗ ܘܺܐܝܬ݂ܰܘܗ݈ܝ ܒ݁ܰܝܬ݁ܶܗ ܚܢܰܢ ܐܶܢ ܥܕ݂ܰܡܳܐ ܠܚܰܪܬ݂ܳܐ ܢܶܐܚܽܘܕ݂ ܓ݁ܰܠܝܽܘܬ݂ ܐܰܦ݁ܶܐ ܘܫܽܘܒ݂ܗܳܪܳܐ ܕ݁ܣܰܒ݂ܪܶܗ ܀

⁷ ܡܶܛܽܠ ܕ݁ܶܐܡܪܰܬ݂ ܪܽܘܚܳܐ ܕ݁ܩܽܘܕ݂ܫܳܐ ܕ݁ܝܰܘܡܳܢܳܐ ܐܶܢ ܒ݁ܩܳܠܶܗ ܬ݁ܶܫܡܥܽܘܢ ܀⁸ ܠܳܐ ܬ݁ܩܰܫܽܘܢ ܠܶܒ݁ܰܘܳܬ݂ܟ݂ܽܘܢ ܠܡܰܪܓ݁ܳܙܽܘܬ݂ܶܗ ܐܰܝܟ݂ ܡܡܰܪܡܪܳܢܶܐ ܘܰܐܝܟ݂ ܝܰܘܡܳܐ ܕ݁ܢܶܣܝܽܘܢܳܐ ܕ݁ܰܒ݂ܡܰܕ݂ܒ݁ܪܳܐ ܀⁹ ܕ݁ܢܰܣܝܽܘܢܝ ܐܰܒ݂ܳܗܰܝܟ݁ܽܘܢ ܘܰܒ݂ܩܰܘ ܚܙܰܘ ܥܒ݂ܳܕ݂ܰܝ ܐܰܪܒ݁ܥܺܝܢ ܫܢܺܝܢ ܀¹⁰ ܡܶܛܽܠ ܗܳܢܳܐ ܡܶܐܢܰܬ݂ ܠܺܝ ܒ݁ܕ݂ܳܪܳܐ ܗܰܘ ܘܶܐܡܪܶܬ݂ ܕ݁ܥܰܡܳܐ ܗ݈ܘ ܕ݁ܛܳܥܶܐ ܠܶܒ݁ܗܽܘܢ ܘܗܶܢܽܘܢ ܠܳܐ ܝܺܕ݂ܰܥܘ ܐܽܘܪܚܳܬ݂ܝ ܀¹¹ ܘܰܐܝܟ݂ ܕ݁ܺܝܡܺܝܬ݂ ܒ݁ܪܽܘܓ݂ܙܝ ܕ݁ܠܳܐ ܢܶܥܠܽܘܢ ܠܰܢܝܳܚܬ݁ܝ ܀¹² ܐܶܙܕ݁ܰܗ݈ܪܘ ܗܳܟ݂ܺܝܠ ܐܰܚܰܝ ܕ݁ܰܠܡܳܐ ܢܶܗܘܶܐ ܒ݁ܐ݈ܢܳܫ ܡܶܢܟ݂ܽܘܢ ܠܶܒ݁ܳܐ ܒ݁ܺܝܫܳܐ ܕ݁ܠܳܐ ܡܗܰܝܡܶܢ ܘܬ݂ܶܦ݂ܪܩܽܘܢ ܡܶܢ ܐܰܠܳܗܳܐ ܚܰܝܳܐ ܀¹³ ܐܶܠܳܐ ܒ݁ܥܰܘ ܡܶܢ ܢܰܦ݂ܫܟ݂ܽܘܢ ܟ݁ܽܠܗܽܘܢ ܝܰܘܡܳܬ݂ܳܐ ܥܕ݂ܰܡܳܐ ܠܝܰܘܡܳܐ ܕ݁ܡܶܬ݂ܩܪܶܐ ܝܰܘܡܳܢܳܐ ܕ݁ܠܳܐ ܢܶܬ݂ܩܰܫܶܐ ܐ݈ܢܳܫ ܡܶܢܟ݂ܽܘܢ ܒ݁ܛܳܥܝܽܘܬ݂ܳܐ ܕ݁ܰܚܛܺܝܬ݂ܳܐ ܀¹⁴ ܐܶܬ݂ܚܰܠܰܛܢ ܓ݁ܶܝܪ ܥܰܡ ܡܫܺܝܚܳܐ ܐܶܢ ܡܶܢ ܪܺܝܫܺܝܬ݂ܳܐ ܘܰܥܕ݂ܰܡܳܐ ܠܰܐ݈ܚܪܳܝܬ݁ܳܐ ܒ݁ܶܗ ܒ݁ܰܩܝܳܡܳܐ ܗܳܢܳܐ ܫܰܪܺܝܪܳܐ ܢܚܰܡܣܶܢ ܀¹⁵ ܐܰܝܟ݁ܰܢܳܐ ܕ݁ܰܐܡܺܝܪ ܕ݁ܝܰܘܡܳܢܳܐ ܐܶܢ ܒ݁ܰܪ݈ܬ݂ ܩܳܠܶܗ ܬ݁ܶܫܡܥܽܘܢ ܠܳܐ ܬ݁ܩܰܫܽܘܢ ܠܶܒ݁ܰܘܳܬ݂ܟ݂ܽܘܢ ܠܡܰܪܓ݁ܳܙܽܘܬ݂ܶܗ ܀¹⁶ ܡܰܢ ܐܶܢܽܘܢ ܓ݁ܶܝܪ ܗܳܢܽܘܢ ܕ݁ܰܫܡܰܥܘ ܘܰܐܪܓ݁ܙܽܘܗ݈ܝ ܠܳܐ ܟ݁ܽܠܗܽܘܢ ܗܳܠܶܝܢ ܕ݁ܰܢܦ݂ܰܩܘ ܡܶܢ ܡܶܨܪܶܝܢ ܒ݁ܝܰܕ݂ ܡܽܘܫܶܐ ܀¹⁷ ܘܒ݂ܰܐܝܠܶܝܢ ܡܶܐܢܰܬ݂ ܠܶܗ ܐܰܪܒ݁ܥܺܝܢ ܫܢܺܝܢ ܐܶܠܳܐ ܒ݁ܗܳܢܽܘܢ ܕ݁ܰܚܛܰܘ ܘܓ݂ܰܪܡܰܝܗܽܘܢ ܢܦ݂ܰܠܘ ܒ݁ܡܰܕ݂ܒ݁ܪܳܐ ܀¹⁸ ܘܥܰܠ ܐܰܝܠܶܝܢ ܝܺܡܳܐ ܕ݁ܠܳܐ ܢܶܥܠܽܘܢ ܠܰܢܝܳܚܬ݁ܶܗ ܐܶܠܳܐ ܥܰܠ ܗܳܢܽܘܢ ܕ݁ܠܳܐ ܐܶܬ݁ܛܦ݁ܺܝܣܘ ܀¹⁹ ܘܚܳܙܶܝܢܰܢ ܕ݁ܠܳܐ ܐܶܫܟ݁ܰܚܘ ܠܡܶܥܰܠ ܡܶܛܽܠ ܕ݁ܠܳܐ ܗܰܝܡܶܢܘ ܀