Read the Bible

¹ por ai është nën kujdestarë dhe administratorë deri në kohën e caktuar nga i ati.² Kështu edhe ne, sa ishim të mitur, ishim të robëruar nën elementet e botës,³ por, kur u mbush koha, Perëndia dërgoi Birin e tij, të lindur prej gruaje, të nënshtruar ligjit,⁴ që të shpengonte ata që ishin nën ligj, që ne të fitojmë birërinë.⁵ Dhe, duke qenë se jeni bij, Perëndia dërgoi Frymën e Birit të tij në zemrat tuaja që thërret: ''Abba, Atë!''.⁶ Prandaj ti nuk je më shërbëtor, por bir; dhe në qoftë se je bir, je edhe trashëgimtar i Perëndisë me anë të Krishtit.⁷ Por atëherë, duke mos njohur Perëndinë, u shërbyet atyre që prej natyre nuk janë perëndi;

⁸ kurse tani, mbasi njohët Perëndinë, më mirë të them se u njohët prej Perëndisë, vallë si ktheheni përsëri te elementet e dobët dhe të varfër, tek të cilët doni përsëri t'u nënshtroheni?⁹ Sepse ju i kremtoni me kujdes disa ditë, muaj, stinë dhe vite.¹⁰ Kam frikë se mos jam munduar më kot për ju.¹¹ O vëllezër, bëhuni si unë, sepse edhe unë jam si ju; ju lutem, o vëllezër, ju s'më keni bërë asnjë të keqe.

¹² Dhe ju e dini se në të kaluarën unë ju predikova ungjillin me dobësi të mishit;¹³ dhe ju nuk më përbuzët aspak dhe s'patët neveri për provën që ishte në mishin tim, por më pranuat si engjëll Perëndie, si Jezu Krishtin vet.¹⁴ Cili ishte, pra, gëzimi juaj? Sepse unë dëshmoj për ju se, po të qe e mundur, ju do të nxirrnit edhe sytë tuaj dhe do të m'i jepnit mua.¹⁵ A thua u bëra armiku juaj, duke ju thënë të vërtetën?¹⁶ Ata tregohen të zellshëm ndaj jush, por jo për qëllime të ndershme; madje ata duan t'ju shkëputin që të jeni të zellshëm ndaj tyre.

¹⁷ Mirë është të jesh gjithnjë i zellshëm për të mirë, dhe jo vetëm kur ndodhem midis jush.¹⁸ Djemtë e mi, që unë i lind përsëri, derisa të formohet Krishti në ju!

¹⁹ Do të doja tashti të isha midis jush dhe ta ndryshoja tingullin e zërit tim, sepse jam ndërdyshas ndaj jush.²⁰ Po më thoni, ju që doni të jeni nën ligj, a nuk e dëgjoni ligjin?

²¹ Sepse është shkruar se Abrahami pati dy bij: një nga shërbëtorja dhe tjetri nga e lira.²² Dhe ai që lindi nga shërbëtorja lindi sipas mishit, por ai që lindi nga e lira lindi për hir të premtimit.²³ Këto gjëra kanë një kuptim alegorik, sepse këto dy gra janë dy besëlidhje: një nga mali Sinai, që ngjiz për skllavëri, dhe është Agari.²⁴ Dhe Agari është mali Sinai në Arabi dhe i përgjigjet Jeruzalemit të kohës së sotme; dhe ajo është skllave me bijtë e saj.²⁵ Ndërsa Jeruzalemi nga lart është i lirë dhe është nëna e ne të gjithëve.²⁶ Sepse është shkruar: ''Gëzohu ti, o shterpë, që nuk lind! Shpërthe dhe klith, ti që nuk i provon dhembjet e lindjes, sepse bijtë e së braktisurës do të jenë më të shumtë se të asaj që e kishte burrin''.²⁷ Kurse ne, o vëllezër, jemi bij të premtimit, sikundër ishte Isaku.²⁸ Po, sikurse atëherë ai që lindi sipas mishit përndiqte atë që kishte lindur sipas Frymës, kështu është edhe tani.²⁹ Po çfarë thotë shkrimi? ''Dëboje skllaven dhe djalin e saj, sepse i biri i skllaves nuk mund të jetë trashëgimtar bashkë me djalin e së lirës''.³⁰ Kështu, pra, vëllezër, ne nuk jemi bij të skllaves, por të së lirës.³¹ Qëndroni, pra, të patundur në lirinë, me të cilën Krishti na liroi, dhe mos hyni përsëri nën zgjedhën e skllavërisë.