Read the Bible

¹ Vir die musiekleier; op die Gittiet. 'n Psalm van Asaf. ² Jubel tot eer van God, ons sterkte! Juig tot eer van die God van Jakob!³ Hef aan 'n lied en laat die tamboeryn klink, die lieflike siter saam met die harp.⁴ Blaas die basuin op nuwemaan, op volmaan vir ons feesdag.⁵ Want dit is 'n insetting vir Israel, 'n verordening van die God van Jakob.⁶ Hy het dit ingestel as getuienis in Josef toe Hy uitgetrek het teen Egipteland. 'n Taal wat ek nie geken het nie, het ek gehoor:⁷ Ek het sy skouer bevry van die las, sy hande het die mandjie gelos.

⁸ In die nood het jy geroep, en Ek het jou uitgered; Ek het jou geantwoord in die skuilplek van die donder; Ek het jou getoets by die waters van Mériba. Sela.⁹ Hoor, my volk, en Ek wil jou dit inskerp; Israel, as jy tog na My wou luister!¹⁰ Daar mag by jou geen vreemde god wees nie, en voor 'n uitlandse god mag jy jou nie neerbuig nie.¹¹ Ek is die HERE jou God wat jou laat optrek het uit Egipteland; maak jou mond wyd oop, dat Ek dit kan vul.¹² Maar my volk het na my stem nie geluister nie, en Israel was vir My nie gewillig nie.¹³ Toe het Ek hulle oorgegee aan die verhardheid van hul hart, dat hulle in hul eie planne kon wandel.¹⁴ Ag, as my volk maar na My wou luister, Israel in my weë wou wandel!¹⁵ Gou sou Ek hul vyande onderwerp en my hand teen hul teëstanders uitstrek.¹⁶ Die haters van die HERE sou kruipende na Hom toe kom; maar húlle tyd sou vir ewig wees.

¹⁷ Ja, Hy sou hulle voed met die beste van die koring; en met heuning uit die rots sou Ek jou versadig.