Read the Bible

¹ 'n Psalm van Dawid, by die gedenkoffer.² o HERE, straf my nie in u toorn nie en kasty my nie in u grimmigheid nie.³ Want u pyle het in my ingedring, en u hand het op my neergedaal.⁴ Daar is geen heel plek in my vlees vanweë u grimmigheid nie; daar is niks gesond in my gebeente vanweë my sonde nie.⁵ Want my ongeregtighede gaan oor my hoof; soos 'n swaar pak het hulle vir my te swaar geword.⁶ My wonde stink, hulle dra vanweë my dwaasheid.⁷ Ek is krom, heeltemal geboë; die hele dag gaan ek in die rou;⁸ want my lendene is vol ontsteking, en daar is geen heel plek in my vlees nie.⁹ Ek is kragteloos en heeltemal verbrysel; ek brul van die gebons van my hart.¹⁰ Here, voor U is al my begeertes, en my gesug is vir U nie verborge nie.¹¹ My hart slaan vinnig, my krag het my verlaat; en die lig van my oë, ook dit is nie by my nie.

¹² Die wat my liefhet en my vriende is, staan opsy vir my kwaal, en my nabestaandes het ver gaan staan;¹³ en die wat my lewe soek, span strikke; en die wat my ongeluk soek, spreek van ondergang, en hulle bedink die hele dag bedrog.¹⁴ Maar ek is soos 'n dowe: ek hoor nie, en soos 'n stomme wat sy mond nie oopmaak nie.¹⁵ Ja, ek is soos 'n man wat nie hoor nie en in wie se mond geen teëspraak is nie;¹⁶ want op U, HERE, wag ek; U sal verhoor, Here my God!¹⁷ Want ek het gesê: Laat hulle net nie bly wees oor my nie! Hulle wat by die wankeling van my voet hul groot maak teen my!¹⁸ Want ek is klaar om te val, en my smart is altyddeur voor my.¹⁹ Ja, my ongeregtigheid bely ek, ek is bekommerd oor my sonde.²⁰ Maar my vyande lewe, hulle is magtig; en die wat my valslik haat, is groot in aantal.²¹ En die wat kwaad vir goed vergeld, behandel my vyandig, omdat ek die goeie najaag.²² Verlaat my nie, o HERE! My God, wees nie ver van my af nie!

²³ Maak tog gou om my te help, Here, my heil!