Study Desk

He that kepith his mouth, kepith his soule; but he that is vnwar to speke, schal feel yuels.

A slow man wole, and wole not; but the soule of hem that worchen schal be maad fat.

A iust man schal wlate a fals word; but a wickid man schendith, and schal be schent.

Riytfulnesse kepith the weie of an innocent man; but wickidnesse disseyueth a synnere.

Redempcioun of the soule of man is hise richessis; but he that is pore, suffrith not blamyng.

The liyt of iust men makith glad; but the lanterne of wickid men schal be quenchid.

Stryues ben euere a mong proude men; but thei that don alle thingis with counsel, ben gouerned bi wisdom.

Hastid catel schal be maad lesse; but that that is gaderid litil and litil with hond, schal be multiplied.

He that bacbitith ony thing, byndith hym silf in to tyme to comynge; but he that dredith the comaundement, schal lyue in pees.

A fel man doith alle thingis with counsel; but he that is a fool, schal opene foli.

Nedynesse and schenschip is to him that forsakith techyng; but he that assentith to a blamere, schal be glorified.

He that sparith the yerde, hatith his sone; but he that loueth him, techith bisili.

A iust man etith, and fillith his soule; but the wombe of wickid men is vnable to be fillid.

Where oxis ben not, the cratche is void; but where ful many cornes apperen, there the strengthe of oxe is opyn.

Sotheli a weie is, that semeth iust to a man; but the laste thingis therof leden forth to deth.

A pore man schal be hateful, yhe, to his neiybore; but many men ben frendis of riche men.

He that dispisith his neiybore, doith synne; but he that doith merci to a pore man, schal be blessid. He that bileueth in the Lord, loueth merci;

He that is pacient, is gouerned bi myche wisdom; but he that is vnpacient, enhaunsith his foli.

He that falsli chalengith a nedi man, dispisith his maker; but he that hath merci on a pore man, onourith that makere.

A wickid man is put out for his malice; but a iust man hopith in his deth.