Study Desk

And to me it is for the leest thing, that Y be demyd of you, or of mannus dai; but nether Y deme my silf.

For Y am no thing ouer trowynge to my silf, but not in this thing Y am iustified; for he that demeth me, is the Lord.

And, britheren, Y haue transfigurid these thingis in to me and in to Apollo, for you; that in vs ye lerne, lest ouer that it is writun, oon ayens another be blowun with pride for another.

And Y gesse, that God schewide vs the laste apostlis, as thilke that ben sent to the deth; for we ben maad a spectacle to the world, and to aungels, and to men.

We foolis for Crist, but ye prudent in Crist; we sike, but ye stronge; ye noble, but we vnnoble.

For whi if ye han ten thousynde of vndur maistris in Crist, but not many fadris; for in Crist Jhesu Y haue gendrid you bi the gospel.

For the rewme of God is not in word, but in vertu.

Clense ye out the old sourdow, that ye be new sprengyng togidere, as ye ben therf. For Crist offrid is oure pask.

For what is it to me to deme of hem that ben with oute forth? Whether ye demen not of thingis that ben with ynne forth?

For God schal deme hem that ben withouten forth. Do ye awei yuel fro you silf.

And now trespas is algatis in you, for ye han domes among you. Whi rather take ye no wrong? whi rather suffre ye not disseit?

For God reiside the Lord, and schal reise vs bi his vertu.

Whether ye witen not, that he that cleueth to an hoore, is maad o bodi? For he seith, Ther schulen be tweyne in o fleisch.

For ye ben bouyt with greet prijs. Glorifie ye, and bere ye God in youre bodi.

But for fornycacioun eche man haue his owne wijf, and ech womman haue hir owne hosebonde.

Nyle ye defraude eche to othere, but perauenture of consent to a tyme, that ye yyue tent to preier; and eft turne ye ayen to the same thing, lest Sathanas tempte you for youre vncontynence.

For Y wole, that alle men be as my silf. But eche man hath his propre yifte of God; oon thus, and another thus.

That if thei conteynen not hem silf, be thei weddid; for it is betere to be weddid, than to be brent.

For the vnfeithful hosebonde is halewid bi the feithful womman, and the vnfeithful womman is halewid bi the feithful hosebonde. Ellis youre children weren vncleene, but now thei ben hooli.

That if the vnfeithful departith, departe he. For whi the brother or sistir is not suget to seruage in siche; for God hath clepid vs in pees.