Study Desk

but drede thou, for if God sparide not the kyndli braunchis, lest perauenture he spare not thee.

Yhe, and thei schulen be set yn, if thei dwellen not in vnbileue. For God is myyti, to sette hem in eftsoone.

For if thou art kit doun of the kyndeli wielde olyue tre, and ayens kynd art set in to a good olyue tre, hou myche more thei that ben bi kynde, schulen be set in her olyue tree?

But, britheren, Y wole not that ye vnknowen this mysterie, that ye be not wise to you silf; for blyndenesse hath feld a parti in Israel, til that the plente of hethene men entride,

Aftir the gospel thei ben enemyes for you, but thei ben moost dereworthe bi the eleccioun for the fadris.

And as sum tyme also ye bileueden not to God, but now ye han gete mercy for the vnbileue of hem;

For God closide alle thingis togidere in vnbileue, that he haue mercy on alle.

For whi who knew the wit of the Lord, or who was his counselour? or who formere yaf to hym,

For of hym, and bi hym, and in hym ben alle thingis. To hym be glorie in to worldis. Amen.

For Y seie, bi the grace that is youun to me, to alle that ben among you, that ye sauere no more than it bihoueth to sauere, but for to sauere to sobrenesse; and to ech man, as God hath departid the mesure of feith.

For as in o bodi we han many membris, but alle the membris han not the same dede;

for to ioye with men that ioyen, for to wepe with men that wepen.

to no man yeldynge yuel for yuel, but purueye ye good thingis, not oneli bifor God, but also bifor alle men.

Ye moost dere britheren, not defendynge you silf, but yyue ye place to wraththe; for it is writun, The Lord seith, To me veniaunce, and Y schal yelde.

But if thin enemy hungrith, fede thou hym; if he thirstith, yyue thou drynke to hym; for thou doynge this thing schalt gidere togidere colis on his heed.

Euery soule be suget to heiyere powers. For ther is no power but of God, and tho thingis that ben of God, ben ordeyned.

For princes ben not to the drede of good work, but of yuel. But wilt thou, that thou drede not power? Do thou good thing, and thou schalt haue preisyng of it;

for he is the mynystre of God to thee in to good. But if thou doist yuel, drede thou; for not with outen cause he berith the swerd, for he is the mynystre of God, vengere in to wraththe to hym that doith yuel.

And therfor bi nede be ye suget, not oneli for wraththe, but also for conscience.

For therfor ye yyuen tributis, thei ben the mynystris of God, and seruen for this same thing.