Study Desk

Blessid ben thei that suffren persecusioun for riytfulnesse, for the kingdam of heuenes is herne.

`Ye schulen be blessid, whanne men schulen curse you, and schulen pursue you, and shulen seie al yuel ayens you liynge, for me.

Ioie ye, and be ye glad, for youre meede is plenteuouse in heuenes; for so thei han pursued `also profetis that weren bifor you.

But Y seie to you, that euery man that seeth a womman for to coueite hir, hath now do letcherie bi hir in his herte.

That if thi riyt iye sclaundre thee, pulle hym out, and caste fro thee; for it spedith to thee, that oon of thi membris perische, than that al thi bodi go in to helle.

And if thi riyt hond sclaundre thee, kitte hym aweye, and caste fro thee; for it spedith to thee that oon of thi membris perische, than that al thi bodi go in to helle.

But Y seie to you, that ye swere not `for ony thing; nethir bi heuene, for it is the trone of God;

nether bi the erthe, for it is the stole of his feet; nether bi Jerusalem, for it is the citee of a greet kyng; nether thou shalt not swere bi thin heed,

for thou maist not make oon heere white, ne blacke;

Ye han herd that it hath be seid, Iye for iye, and tothe for tothe.

But Y seie to you, loue ye youre enemyes, do ye wel to hem that hatiden you, and preye ye for hem that pursuen, and sclaundren you;

For if ye louen hem that louen you, what mede schulen ye han? whether pupplicans doon not this?

But in preiyng nyle yee speke myche, as hethene men doon, for thei gessen that thei ben herd in her myche speche.

Therfor nyle ye be maad lich to hem, for your fadir woot what is nede to you, bifore that ye axen hym.

Amen. For if ye foryyuen to men her synnes, youre heuenli fadir schal foryyue to you youre trespassis.

But whanne ye fasten, nyle ye be maad as ypocritis sorewful, for thei defacen hem silf, to seme fastyng to men; treuli Y seie to you, they han resseyued her meede.

For where thi tresoure is, there also thin herte is.

No man may serue tweyn lordis, for ethir he schal hate `the toon, and loue the tother; ethir he shal susteyne `the toon, and dispise the tothir. Ye moun not serue God and richessis.

Biholde ye the foulis of the eire, for thei sowen not, nethir repen, nethir gaderen in to bernes; and youre fadir of heuene fedith hem. Whether ye ben not more worthi than thei?

For hethene men seken alle these thingis; and youre fadir woot, that ye han nede to alle these thingis.